अकोला पोलिस दलात चाललेल्या भ्रष्टाचार व लाचखोरीने जिल्ह्यातील सर्वसामान्य जनता वैतागलेली असतानाच, पोलिस अधीक्षक अर्चित चांडक यांच्या केबिनला लागूनच असलेल्या आस्थापना विभागातील एका लाचखोर महिलेला अमरावती एसीबीच्या अधिकाऱ्यांनी "लाचखोरी" करीत असताना रंगेहाथ पकडून अकोला पोलिस दलात सुरू असलेल्या लाचखोरीवर "शिक्कामोर्तब" केले आहे.
गेल्या काही महिन्यांपासून अकोला पोलिस दलातील भ्रष्टाचाराला अक्षरशः ऊत आला असून त्या "भ्रष्टाचाराच्या गटारगंगे"चा मुळात "उगम" हा जिल्हा पोलिस अधीक्षक कार्यालयातूनच झाला असल्याचे आज अमरावती एसीबीच्या अधिकाऱ्यांनी केलेल्या कारवाईतून स्पष्ट झाले आहे. जिल्हा पोलिस अधीक्षक यांच्या "खुर्ची"शेजारीच जर "लाचखोरी" होत असेल तर संपूर्ण जिल्ह्यात काय अवस्था असेल याचा विचार केल्यास "चक्कर" आल्याशिवाय राहणार नाही.
याआधीही पोलिस अधीक्षकांच्या पूर्णा नदी घाटावरील बंदोबस्त पाहणीदरम्यान कर्तव्यावर असलेल्या दहीहंडा पोलिस स्टेशनच्या पोलिस कर्मचाऱ्याने एस.पी.ह्यांनी अकोल्याकडे जायला पाठ फिरविता बरोबर पाचच मिनिटात लाचेची रक्कम स्वीकारत असताना त्याला रंगेहाथ अटक करण्यात आली होती.आणि आता तर चक्क त्यांच्याच कार्यालयात असलेल्या त्यांच्या केबिनच्या भिंतीलगतच्या कार्यालयात अगदी खुलेआम लाचेची रक्कम स्वीकारत असताना महिला कर्मचाऱ्याला "रंगेहाथ पकडण्या"त आले आहे. ही अकेलेकरांसाठी मात्र प्रचंड असुरक्षिततेची आणि अविश्वनीय अशी बाब आहे.
आज पोलिस अधीक्षक कार्यालयात लाचखोरीच्या प्रकरणांत रंगेहाथ पकडण्यात आलेल्या लाचखोर महिला कर्मचाऱ्याचे नाव ममता संजय पाटील, वय ५० वर्षे, पद वरिष्ठ लिपीक वर्ग ३, आस्थापना विभाग, पोलीस अधीक्षक, कार्यालय अकोला ह.मु. गिता नगर, तीन बंगला जवळ, तोळकर यांच्या घरी भाडयाने अकोला, मुळ पत्ता वृंदावन नगर, चिखली रोड, बुलडाणा, असे आहे.
अमरावती एसीबीकडे प्राप्त तक्रारीनुसार यातील तकारदार हे धान्य खरेदी विक्रीचा व्यवसाय करतात. त्यांचेकडे कमिशन पद्धतीने काम करणारा कैलास ओमप्रकाश अग्रवाल यांनी ऑक्टोबर २०२३ मध्ये तक्रारदार यांच्या परवानगी शिवाय त्यांच्या वेअर हाउस मधील धान्य विकुन तक्रारदाराची फसवणूक केली होती. त्यावरून पो.स्टे. रामदास पेठ, अकोला येथे फसवणूकीचा गुन्हा दाखलकरण्यात आला आहे. सदर गुन्हयाचा तपास पोलीस स्टेशन रामदास पेठ तसेच गुन्हे शाखा अकोला यांचेकडे असुन सदर गुन्ह्यात तपासी अधिका-यांनी आरोपी कैलास अग्रवाल यांना मदत केल्यामुळे त्यांना जामीन मिळाला. असे तक्रारदाराचे म्हणणे होते. त्यामुळे तक्रारदार यांनी सदर गुन्ह्यातील तपासी अधिकारी यांनी आरोपीस मदत केली म्हणून त्यांना जामीन मिळाला आहे. म्हणून सदर अधिका-यावर फौजदारी कार्यवाही करण्यात यावी. अशा आशयाचा तक्रार अर्ज पोलीस अधीक्षक, कार्यालय अकोला येथे दिला होता. सदर अर्जाच्या अनुषंगाने पोलीस अधीक्षक, अकोला यांचे आदेशावरुन अपर पोलीस अधीक्षक अकोला यांनी चौकशी करुन अहवाल पोलीस अधीक्षक, कार्यालय अकोला येथे पाठविला आहे. सदर अहवालावर नोटशीट तयार करुन वरिष्ठांना सादर करण्यासाठी वरिष्ठ लिपीक श्रीमती ममता संजय पाटील, नेमणुक आस्थापना विभाग, पोलीस अधीक्षक कार्यालय,अकोला यांनी तक्रारदार यांना २०,००० रुपये लाचेची मागणी करुन नोटशीट सादर करण्यापुर्वी १०,००० रुपये व नोटशीट सदर केल्यावर १०००० रुपये दयावे लागतील अशी लाचेची मागणी करीत असल्याची तकार लाचलुचपत प्रतिबंधक विभाग, अमरावती कार्यालय येथे दिली होती.
तक्रारदाराच्या सदर तक्रारीवर कारवाई करण्यासाठी एसीबीच्या वरिष्ठ अधिकाऱ्यांनी आदेश दिल्याने आज गुरुवार दि. ०६/११/२०२५ रोजी तक्रारीची सत्यता पडताळणी कारवाई केली असता तकारदार यांच्या अर्जानुसार अपर पोलीस अधीक्षक, अकोला यानी दिलेला अहवाल पोलीस अधीक्षक, कार्यालय अकोला येथे पाठविला आहे. सदर अहवालावर नोटशिट सादर करण्यापुर्वी ममता संजय पाटील, वरीष्ठ लिपीक, यांनी तक्रारदार यांना तडजोडीअंती ८,००० रुपये लाचेची मागणी करुन स्वीकारण्याचे मान्य केल्याने लगेच लावण्यात आलेल्या सापळ्यात पंचासमक्ष तक्रारदारा कडून लाचेची रक्कम स्विकारली असता आज रोजी सायंकाळी साडे सहा वाजताच्या दरम्यान ममता सजय पाटील, वरिष्ठ लिपीक यांस रंगेहाथ पकडून ताब्यात घेण्यात आले असुन पोलिस अधीक्षक कार्यालयातील लाचखोर महिला कर्मचाऱ्याविरुद्ध पो.स्टे. खदान, अकोला येथे भ्रष्टाचार प्रतिबंधक अधिनियम १९८८ नुसार गुन्हा दाखल करण्यात आला आहे.
सदर कारवाई लाचलुचपत प्रतिबंधक विभाग,अमरावती येथील उपअधीक्षक सुनिल किनगे यांचे मार्गदर्शनाखाली सापळा अधिकारी पोलीस निरीक्षक श्रीमती चित्रा मेसरे, पोलीस निरीक्षक ज्ञानोबा फड, पोलीस हवालदार राहुल वंजारी, प्रमोद रायपुरे, पोकॉ. शैलेश कडू, चालक पोउपनि. सतिश किटूकले यांनी यशस्वीरित्या पार पाडली.
0 टिप्पण्या