प्रादेशिक कनेक्टिव्हिटी योजनेअंतर्गत मुंबई-अमरावती-मुंबई मार्गावर 'अलायन्स एअर' या कंपनीच्या माध्यमातून एटीआर ७२ आसनी विमान सेवा सुरू करण्याचे नियोजन असून अमरावती विमानतळावरून ३१ मार्चला प्रवासी विमानसेवा सुरू होणार असल्याची घोषणा उपमुख्यमंत्री अजित पवार यांनी अर्थसंकल्पीय भाषणात केली होती.परंतु अजूनही विमानसेवेचे वेळापत्रक आणि उद्घाटनाची तारीख निश्चित न झाल्याने प्रवासी विमानसेवा सुरू होण्याचा मुहूर्त बारगळला ही मात्र निश्चित आहे.
येत्या १५ ते २० दिवसांमध्ये विमानसेवेचे उद्घाटन होण्याची शक्यता व्यक्त केली जात आहे. अमरावती विमानतळावर नवीन धावपट्टी तयार करण्यात आली असून त्यासाठी अत्याधुनिक तंत्रज्ञान वापरण्यात आले आहे. १८ बाय ५० मीटरची ही धावपट्टी असून त्यावरून एटीआर हे ७२ आसनी विमान उडू शकणार आहे.
विमानतळ प्रवासी वाहतुकीच्या दृष्टीने सज्ज करण्यात आले असून १३ मार्चलाच अमरावती विमान तळाला नागरी विमान वाहतूक महासंचालनालयाने (डीजीसीए) परवाना दिला तर 'रिजनल कनेक्टिव्हीटी स्कीम' अंतर्गत अमरावती विमानतळ हे अधिकृत परवानाधारक विमानतळ म्हणून घोषित करण्यात आले आहे. अलायन्स एअरची मुंबई-अमरावती-मुंबई ही विमानसेवा काही दिवस आठवड्यातून तीनदा सेवा देणार आहे.
अमरावती विमानतळाला 'एव्हीटी' हा "आयएटीए कोड" प्राप्त झाला आहे. "आयएटीए" ही आंतरराष्ट्रीय हवाई वाहतूक संघटना आहे. शासनाने घोषणा केलेली असली तरीसुद्धा अलायन्स एअरलाइन्सने अद्यापी वेळापत्रक घोषित केलेले नाही. ७२ आसनी विमान, विमानातील क्रू मेंबर्स,एअर होस्टेस, वैमानिक यांची नियुक्ती तसेच विमानतळावर कार्यालय, चेकइन, चेकआऊट, प्रवाशांच्या वस्तू तपासणी करणारी अत्याधुनिक यंत्रणा,सुरक्षा व्यवस्था,आणि यासाठी लागणारया पुरेशा कर्मचारीवर्गाची संपूर्ण व्यवस्था करावी लागेल.
दरम्यान, विमानतळाच्या परिसरात उद्घाटन समारंभाची तयारी सुरू झाली आहे. लवकरच उद्घाटनाची तारीख घोषित होऊ शकते, मात्र ३१ मार्चचा मुहूर्त टळला हे मात्र निश्चित आहे.
आता अमरावतीकरांना विमानसेवेच्या वेळापत्रकाची प्रतीक्षा आहे."अलायन्स एअर"च्या संकेत स्थळावर विमातळांच्या यादीत "अमरावती" हे नाव झळकत असले तरी,अमरावती विमानतळावरून पहिल्या व्यावसायिक विमान उड्डाणाची अमरावतीकरांची उत्सुकता मात्र शिगेला पोहोचली आहे.
0 टिप्पण्या