राज्याचे मुख्यमंत्री देवेंद्र फडणवीस पालकमंत्री असलेल्या गडचिरोली जिल्ह्यात आरोग्य विभागात कार्यरत असलेल्या एका वैद्यकीय अधिकाऱ्यावर लाचलुचपत प्रतिबंधक विभागाच्या अधिकाऱ्यांनी हाताखाली काम करणाऱ्या कर्मचाऱ्यांकडून चक्क १ लाख ३० हजार रुपयांची लाच मागितल्याने काल गुन्हा दाखल करण्यात आला आहे..
अधिनस्थ कर्मचाऱ्याचे रोखलेले पुरवणी पगार देयक काढण्याकरिता नाहरकत प्रमाणपत्रावर सही करण्यासाठी १ लाख ३० हजार रुपयांची लाच मागणाऱ्या वैद्यकीय अधिकाऱ्यावर लाचलुचपत प्रतिबंधक विभागाच्या अधिकाऱ्यांनी काल गुन्हा दाखल केला. डॉ.संभाजी भोकरे,(३६) असे लाचखोर वैद्यकीय अधिकाऱ्याचे नाव असून, तो भामरागड तालुक्यातील लाहेरी येथील प्राथमिक आरोग्य केंद्रात कार्यरत आहे.
एसीबीने दिलेल्या माहितीनुसार, तक्रारकर्त्या कर्मचाऱ्याचे फेब्रुवारी २०२४ ते सप्टेंबर २०२४ आणि नोव्हेंबर महिन्याचे १४ दिवसांचे रोखलेल्या पगाराचे पुरवणी बिल काढावयाचे होते. त्यासाठी कार्यालयप्रमुख म्हणून वैद्यकीय अधिकारी संभाजी भोकरे यांच्या स्वाक्षरीचे नाहरकत प्रमाणपत्र आवश्यक होते. ते देण्यासाठी डॉ.भोकरे याने १ लाख ५० हजार रुपयांची मागणी केली.
तडजोडी अंती तो १ लाख ३० रुपये स्वीकारण्यास तयार झाला. परंतु लाच देण्याची मूळीच इच्छा नसल्याने संबंधित कर्मचाऱ्याने लाचलुचपत प्रतिबंधक विभागाकडे तक्रार केली. त्यानुसार या विभागाच्या अधिकाऱ्यांनी पडताळणी केली असता डॉ.भोकरे याने १ लाख ३० हजार रुपयांची सुस्पष्ट मागणी केल्याचे स्पष्ट झाले. त्यामुळे डॉ.संभाजी भोकरे याच्यावर गुन्हा दाखल करण्यात आला आहे.
0 टिप्पण्या