चिखलदरा पोलिस ठाण्याच्या हद्दीत एका महिलेची प्रचंड मारहाण करून गावातून धिंड काढण्याच्या प्रकाराने संपूर्ण राज्यात खळबळ माजवणाऱ्या रेट्याखेडा येथील प्रकरणात चिखलदरा पोलीस ठाण्याचे तत्कालीन ठाणेदार आनंद पिदुरकर,दोन पोलीस हेड कॉन्स्टेबल आणि एका महिला पोलिस शिपायाला निलंबित करण्यात आले आहे.
अमरावती विभागाचे विशेष पोलिस महानिरीक्षक रामनाथ पोकळे यांनी हा आदेश जारी केला आहे. एसडी पीओ सिद्धेश्वर धुमाळ यांच्या अहवालाची दखल घेत ठानेदारसह अन्य पाच पोलिसांना १ फेब्रुवारी रोजी बदली करून पोलीस मुख्यालयात संलग्न करण्यात आले होते. त्यानंतर तब्बल पाच दिवसांनी म्हणजेच गुरुवार दि.६/२/२०२५ ला त्यांना निलंबित करण्यात आले आहे.
चिखलदरा पोलीस ठाण्याचे ठाणेदार आनंद पिदुरकर,पोलीस हेड कॉन्स्टेबल दीपक सोनाळकर, भीमसिंग उईके, महिला कॉन्स्टेबल प्रमिला जामकर यांना निलंबित करण्याचे आदेश काढण्यात आले आहेत.कर्तव्यात कसूर केल्याच्या आरोपावरून या चौघांना निलंबित करण्यात आल्याने पोलीस वर्तुळात एकच खळबळ उडाली आहे.
0 टिप्पण्या