आज दिवसभरात अकोला पोलिसांनी पूर्ण जिल्हाभरात ग्रामीण भागातील नागरिकांच्या जीवावर उठलेल्या "गावराणी"च्या विरोधात विशेष मोहीम राबवून एक दिवसीय धडक कारवाई करीत थोड्याथोडक्या नव्हे तर ह्या "जहरील्या गावराणी"वर तब्बल ८४ केसेस केल्या आहेत.त्यामुळे अकोला पोलिस खरोखर अभिनंदनास पात्र असल्याने त्यांच्या ह्या कारवाईचे सर्वत्र कौतुक होत आहे.
अकोला पोलीस दलामार्फत जिल्ह्यातील अवैध गावठी दारू निर्मिती व विक्री करणाऱ्यां विरुद्ध विशेष मोहीम राबविण्यात आली. दि.२०.११.२०२५ चे सकाळी १२.०० ते रात्री १२.०० वाजेपर्यंत ही एक दिवसीय विशेष मोहीम प्रभावीपणे पार पाडली. या विशेष मोहिमेत जिल्ह्यातील विविध पोलीस ठाण्यांतील पोलीस पथकांनी एकूण ८३ ठिकाणी कारवाई केली आहे.
ह्या कारवाईदरम्यान सुमारे ७,३३,२५० रुपये किमतीचा मुद्देमाल नष्ट करण्यात आला असून ह्या पैसे कमावण्याच्या नादापायी लोकांचे जीव घेणाऱ्या जीवघेण्या धंद्यात सामील असलेल्यांवर दारूबंदी कायद्यानुसार कारवाई करण्यात आली आहे. तसेच स्थानिक गुन्हे शाखेने स्वतंत्रपणे एका ठिकाणी छापा टाकत अवैध दारू विक्री व निर्मिती करणाऱ्या ठिकाणांवर धाड टाकून सात लिटर गावठी दारू व ३४० लिटर सडवा मोहमाल असा एकुण किंमत ५२,४०० रुपयांचा मुद्देमाल जप्त करण्यात आला. ह्या मोहिम अंतर्गत अकोला पोलिसांनी एकूण ८४ केसेस करून ७,८५,६५० रुपयांच्या अवैध दारू साहित्य नष्ट करण्याची कारवाई केली आहे.
अवैध गावठी ( गावरानी) दारू उत्पादनामुळे जनतेच्या आरोग्याला गंभीर धोका निर्माण होवुन व सामाजिक शांतता भंग होते. या पार्श्वभूमीवर अकोला पोलिस दलाने अशा अवैध धंद्यावर कठोर कारवाई करून जनतेचा विश्वास कायम ठेवला आहे. येत्या काळात सुद्धा अशा प्रकारच्या अवैध व्यवसायांना आळा घालण्यासाठी नेहमी अशाच प्रकारची कठोर कारवाई करण्यात येणार असल्याचे व अवैध दारू विरोधातील ही मोहीम सुरूच राहणार असून, नागरिकांनी अशा प्रकारच्या बेकायदेशीर अवैध दारू विक्री व निर्मिती करणाऱ्यां विषयी माहिती असल्यास जवळच्या पोलीस ठाण्यात कळवावे, असे आवाहन अकोला पोलीस दलाच्या वतीने स्थानिक गुन्हे शाखेचे पोलीस निरीक्षक तथा जनसंपर्क अधिकारी शंकर शेळके, यांनी एका प्रसिद्धीपत्रकाद्वारे केले आहे.
*************************************
अकोला,अमरावती,यवतमाळ,बुलढाणा व वाशीम जिल्ह्यातील नागरिकांसाठी विशेष सूचना....
0 टिप्पण्या